Von Andrin Zumstein – an der Generalversammlung 2025
Ig möcht dä Moment vor GV nütze nid und au grad no am ne ganz bsundrige Vereinsmitglied Danke säge. Ole, die nöchste paar Zile möchti dir widme!
Du hesch di über Johre hinwäg uf beeidruckendi Art und Wis i Dienst vo üsem Verein gsteut. Um ehrlich zsi weiss ig gar nid was für Funktione du aues scho inne gha hesch i dem Verein. Aber woni mit 5 jährig s erste Mau vore bir Dorfhalle z Lommiswil ufem Schuttplatz gsi bi, bisch du aus Trainer emu au zur Verfüegig gstange und hesch äue öbbe 40 Juniore ghulfe schueh binge. Das si jetzt 19 Johr här!
Nachdem unzähligi Johr aus Trainer tätig gsi bisch, hesch du di nid eifach zrügzoge und gseit du bruchsch chli e FC Pause, du hesch direkt e nöchste unglaublich zitinensive Job übernoh. Aus Platzwart bisch du vermuetlich hunderti vo Stunge uf däm Rasemeier ghocket und hesch üs Wuche für Wuche probiert e guete Platz zur Verfüegig steue. Zuesätzlich hesch au immer gluegt, dass aues rund ums Feld 1a usgseht, dr Platz im Herbst igwinterert oder im Früehlig mitem ne grosse Früehligsputz wieder Spielready gmacht. Wär denkt, dass dr Ole nach dr Sanierig vo de Spielfelder und dr Aschaffig vom Raseroboter weniger Zit ufem Weiher verbrocht het, dä tüüscht sich. Öb jätte, wüsche oder Abschrankige ufstelle, du bisch immer aztreffe gsi wenns öbbis ztue geh het. Vermuetlich hani au nid aui Funktione vo dir chönne ufzeue aber dis Engagement und dini Liideschaft si ussergwöhnlich und mir chöi aus Verein unendlich Stolz si, e Mönsch wie di aus Mitglied dürfe zha.
Ole ig zieh mi Huet vor dir! Danke für di unermüedliche Isatz und dini geili Art!
Andrin